Паважаныя чытачы!

Калі вы хочаце вярнуць кнігі ў Бібліятэку перад вакацыямі, мы шчыра запрашаем усіх ахвочых 30 чэрвеня (аўторак) і 1 ліпеня (серада) з 12:00 да 17:00. У інтарэсах Вашай бяспекі мы прапануем наступны спосаб вяртання кніг. Ля ўвахода ў Польскі Інстытут будзе стаяць спецыяльная скрынка, куды неабходна пакласці кнігі. Пасля дэзынфекцыі кнігі будуць выкраслены ў адпаведнасці з нумарамі чытачоў.

Калі вы хочаце ўзяць кнігі, калі ласка, загадзя адпраўце Вашу замову на адрас: biblioteka.minsk@instytutpolski.org. У замове просім пазначыць назвы кніг і меркаваны час прыбыцця ў Інстытут (з 12:00 да 17:00, 30 чэрвеня ці 1 ліпеня). Запакаваныя і падпісаныя кнігі будуць чакаць вас на століку ля ўваходу ў Польскі Інстытут.

Важна: кнігі будуць выдавацца толькі ў пазначаныя дні і толькі па папярэдняй замове. Анлайн-каталог Бібліятэкі даступны на сайце Польскага Інстытута.

Бібліятэка Польскага Інстытута ў Мінску застаецца закрытай да асобнага паведамлення. Вяртанне кніг у згаданыя тэрміны не з’яўляецца абавязковым. Вы можаце спакойна чытаць кнігі да канца вакацый. Жадаем усім здароўя!


 

Сябры! Наша Бібліятэка не спыняе сваю анлайн-працу і працягвае падкідваць новыя чытацкія ідэі. Але як не разгубіцца ў такой процьме электронных кніг, сайтаў і акцый? Памятайце пра тое, што вы заўжды можаце спытаць парады бібліятэкара!

Вы ўжо ведаеце, што хочаце пачытаць, але не ведаеце, дзе гэта знайсці? Прыкідваеце, што было б здорава паглыбіцца ў сучасны дэтэктыў або суняць неспакой якаснай фантастыкай, толькі што выбраць? Шукаеце тую кніжку з чырвонай вокладкай? Бібліятэка будзе рада дапамагчы парадай. Пішыце нам і мы адкажам:  biblioteka.minsk@instytutpolski.org


 

Паважаныя чытачы!

Пакуль Польскі Інстытут у Мінску не прымае наведнікаў і не можа прапанаваць Вам свае кніжные зборы, Бібліятэка перадае сардэчныя прывітанні сваім чытачам і запрашае да чытання электронных кніг і праслухоўвання аўдыёкніг:

https://polona.pl

Адна з самых сучасных лічбавых бібліятэк у свеце і самая вялікая Бібліятэка такога кшталту ў Польшчы. Праект Нацыянальнай Бібліятэкі Польшчы прадстаўляе не толькі ўласныя зборы, але і аб’екты іншых устаноў, аблічбаваныя з выкарыстаннем найноўшых тэхналогій: старадрукі, рукапісы, графіка, карты, нататкі, фотаздымкі, улёткі, афішы і паштоўкі.

WolneLektury.pl

Класіка польскай і сусветнай літаратуры ў электронным выглядзе, ёсць і аўдыякнігі таксама!

http://otworzksiazke.pl

Электронная калекцыя навуковых кніг польскіх даследчыкаў, дзе прадстаўленыя розныя прадметныя сферы.

eBook.pl

Сервіс, прывечаны электронным выданням, з калекцыяй бясплатных часопісаў і кніг.

Наведвальнікам Відэатэкі прапануем 

ninateka.pl

Вялізны партал, які сабраў дакументальныя, мастацкія, анімацыйныя, эксперыментальныя фільмы, запісы тэатральных і оперных спектакляў, канцэртаў, праграм на культурныя, сацыяльныя і побытавыя тэмы, а таксама радыёперадачы і літаратурныя праекты.

У час карантыну кожны дзень а 20: 00 (па польскім часе, па беларускім гэта 22: 00) — спецыяльныя паказы.

http://cyfrowa.tvp.pl

Спецыяльная платформа для аблічбаваных і рэканструяваных серыялаў, фільмаў і тэлевізійнага тэатра️. ️Глядзіце абсалютна бясплатна класіку польскага кіно ў новай якасці.


 
 
Шаноўнае спадарства!

Бібліятэка Польскага Інстытута ў Мінску

працуе па графіку:
 
аўторак, серада, пятніца 12.00-17.00

 Кнігі і часопісы Вас чакаюць!


 
 Бібліятэка Інстытута пачала сваю дзейнасць у кастрычніку 2002 года, і на сённяшні дзень бібліятэчныя фонды складаюць больш за 7000 кніг з наступных раздзелаў:
  • Мастацкая літаратура
  • Літаратура для дзяцей і моладзі
  • Культура і мастацтва
  • Палітыка і гаспадарка
  • Гісторыя
  • Рэлігія і філасофія
  • Тэатр і кіно
  • Біяграфіі славутых людзей 
  • Фотаальбомы
  • Слоўнікі
Кнігі выдаюцца на часовае карыстанне на перыяд да аднаго месяца, але каштоўныя экзэмпляры прапануюцца для прагляду на месцы.
 

Запіс у Бібліятэку Польскага Інстытута ў Мінску адбываецца на падставе сапраўднага пашпарта, а ў выпадку студэнтаў — на падставе пашпарта і студэнцкага білета. За непаўналетняга чытача Бібліятэкі нясуць адказнасць і падпісваюць фармуляр запісу бацькі або правамоцныя апекуны.

Карыстанне Бібліятэкай Польскага Інстытута ў Мінску бясплатнае.

  
 
Відэатэка прапануе фільмы на польскай мове, у фармаце DVD.

Зборы Відэатэкі складаюць кінастужкі XX i XXI стагоддзя, у тым ліку мастацкія і дакументальныя фільмы, якія ўдастоены ўзнагарод польскіх і міжнародных кінафестываляў.

Польскі Інстытут прапануе фільмы як для дарослых, так і для дзяцей. Калекцыя фільмаў уключае найлепшыя класічныя польскія творы і новыя працы сучасных польскіх рэжысёраў.

Аматары польскага тэатра маюць магчымасць пазнаёміцца са спецыяльным цыклам польскага тэлебачання “Залатая сотня” — відэазапіс ста найлепшых тэлевезійных спектакляў.