5.12.2020 Падзея, Тэатр

Прэм’ера! Спектакль “Баладына” паводле драмы Юльюша Славацкага

Шаноўнае спадарства!
Па рашэнні арганізатараў фестывалю прэм’ера спектакля “Баладына” адбудзецца 5 снежня а 18-ай гадзіне ў прасторы “ОК’16”


2 снежня 2020 г. а 20-ай гадзіне ў клубе “Hide” (Кастрычніцкая, 19/4) у рамках XVII Міжнароднага фестывалю студэнцкіх і моладзевых тэатраў «Тэатральны куфар» адбудзецца прэм’ера спектакля “Баладына” паводле драмы Юльюша Славацкага. Спектакль стаў працягам распачатай у верасні бягучага года інсцэнізацыі твора ў межах правядзення акцыі “Нацыянальнае чытанне” («Narodowe Czytanie»).

“Баладына” была завершана ў снежні 1834 года, а выдадзена праз пяць гадоў у Парыжы. Драма паўстала ў эміграцыі падчас дыскусій пра прычыны нядаўняга разгрому лістападаўскага паўстання і дэбатаў аб агульнай гісторыі і будучым лёсе народа. Паэт злучыў у творы рэалізм і фантастыку, засяродзіўшыся на аналізе характараў і ўчынкаў герояў. Расказаная на фоне казачных падзей гісторыя пра дзвюх сясцёр – Баладыну і Аліну – стала вельмі папулярнай. Яна аказала вялікі ўплыў на нацыянальную культуру, а відовішчныя тэатральныя пастаноўкі натхнялі і захаплялі цэлыя пакаленні.

Сёстры Баладына і Аліна жывуць з маці ў беднай хаце ў лесе. Гаплана, каралева возера Гопла, закаханая ў Грабца – каханка Баладыны. З-за сваёй рэўнасці яна ўмешваецца ў чалавечыя справы і блытае лёсы герояў.

Аднойчы служка Гапланы Скерка прыводзіць у лясную хату багатага каралевіча Кіркора. Гаплана спадзяецца, што Кіркор закахаецца ў Баладыну – і тады Грабец застанецца ёй. Аднак воляю Скеркі каралевіч закахаўся ў абедзвюх сясцёр адразу. Каб вырашыць, чыім мужам стане Кіркор, дзяўчаты спаборнічаюць у зборы малін. Кіркор стане мужам той, якая першая назбірае поўны збан. Калі выяўляецца, што выйграла Аліна, Баладына забівае сястру. Адзіным сведкам злачынства з’яўляецца Грабец…

Прага ўлады, павольнае ператварэнне ў сапраўднага злачынцу і зацятая барацьба дабра з ліхам з’яўляюцца асноўнымі матывамі трагедыі.

Пераклад: Лявон Баршчэўскі.

Рэжысёр: Андрэй Саўчанка.

Акцёры: Кацярына Сірыўля, Іван Патапаў, Андрэй Новік, Павел Міхаленя,

Мікола Варабей, Алена Зуй-Вайцехоўская, Паліна Дабравольская,  Аляксей Любчанка, Яраслава Федчанка, Аня Рудак.

Кампазітар: Канстанцін Яськоў.

Сцэнаграфія: Юрый Вінаградаў.

Касцюмы: Алеся Яфімік.

Грым: Марына Марцінчык.

Харэаграфія: Яўген Іваноў.

Афіша: Вольга Савіч.

Святло: Сяргей Голік.

Гук: Андрэй Папкоў.

Відэа: Мікалай Мамінаў, Раман Раманаў.

 

Месца: Арт-прастора “Hide”, Мінск, вул. Кастрычніцкая, 19/4

УВАХОД ВОЛЬНЫ ПА ПАПЯРЭДНЯЙ РЭГІСТРАЦЫІ!

Запісацца анлайн ТУТ.

Запісацца па тэлефоне: +37517 209 54 69

СТРОГІ МАСАЧНЫ РЭЖЫМ!

ПРАГРАМА ФЕСТЫВАЛЮ

Scheduled Падзея >Тэатр